SALMOS 56
SALMO 56
Taita Diospi shunguta churashpa mañanami
(1 Sam. 21:13-15)
Caru urcupi llaquijlla puricuj palomita cantana tonopi, tonota alli yachaj cantachichun quillcashcami. Gat pueblopi filisteocuna Davidta prezu japijpi sumaj shimicunata David quillcashcami.
1Taita Dios ñucata llaquihuayari.
Gentecunaca ñucata millpugrinmari.
Punllantamari catirashpa llaquichin.
2Ñucata p'iñajcunaca punllantamari ñucata saruncuna.
Jatun tucushpa ñucahuan macanacujcunaca achcacunamari.
3Manchaihuan cai punllapica quiquinpimi shunguta churani.
4Taita Dios quiquinpaj shimitaca alli ninimi.
Mana manchashachu.
Taita Diospimi shunguta churani.
Runaca ¿imatataj rurai tucungari?
5Paicunaca punllantami ñucataca mana alli nishpa llaquichincuna.
Paicunapaj yuyaicunaca ñucata llaquichina yuyaillami.
6Tandanacushpa miticushpami, ñuca maita rijtaca chaparancuna.
Ñucata huañuchingapajmi chapancuna.
7Taita Dios paicuna millaita rurashca shinallataj llaquichiyari.
Paicunataca jatunta p'iñarishpa urmachiyari.
8Miticushpa ñuca purishcacunataca quiquinllataj yachanguimi.
Ñuca huiquicunatapish quiquinllatajmi vidrio huallupi churashpa charicungui.
Chaicunaca ¿manachu quiquinpaj libropi quillcashca?
9Taita Diosta ñuca mañai punllapica, ñucata p'iñajcunaca huashamanmi tigrangacuna.
Taita Dios ñucata ayudana cashcataca yachanitajmi.
10Taita Dios quiquinpaj shimitaca alli ninimi.
Mandaj Dios quiquinpaj shimitaca alli ninimi.
11Mana manchashachu Taita Diospimi shunguta churani.
Runaca ¿imatataj rurai tucungari?
12Taita Dios quiquinman cusha nishcacunataca cushatajmi.
Animalcunata huañuchishpa cuj shinaca quiquintami alabasha.
13Huañuimantaca quiquinmari quishpichircangui.
Urmagrijpipish charihuarcanguimi. Taita Diospaj ñaupajpi, luzpi causajcunahuan causachunmi chashna rurarcangui.